Бағаны төмендету аукционын (мемлекеттік материалдық резерв) өткізу қағидалары:

1) егер аукцион басталғаннан кейін екі минут ішінде қатысушылардың ешқайсысы аукционға қойылған сату нысанасын сатып алу ниетін растамаса, онда сату нысанасының бастапқы бағасы Қазақстан Республикасы Үкіметінің 2014 жылғы 17 қазандағы № 1108 қаулысымен бекітілген мемлекеттік материалдық резервтен материалдық құндылықтарды босату қағидаларына (бұдан әрі – Қағидалар) сәйкес белгіленген қадамға төмендетіледі;

2) егер баға төмендетілгеннен кейін екі минут ішінде қатысушылардың ешқайсысы сату нысанасын сатып алу ниетін растамаса, онда сату нысанасының соңғы жарияланған бағасы белгіленген қадамға төмендетіледі.

Бағаны төмендету аукционының жеңімпазы болып жарияланған баға бойынша сату нысанасын сатып алу ниетін бірінші болып растаған қатысушы танылады және осы сату нысанасы бойынша аукцион өткізілген болып есептеледі.

3) егер сату нысанасының бағасы белгіленген ең төменгі деңгейге жеткенде де қатысушылардың ешқайсысы сатып алу ниетін растамаса, онда аукцион өткізілмеген болып есептеледі.

Әрбір сатылған сату нысанасы бойынша аукцион нәтижелері сауда нәтижелері туралы хаттамамен ресімделеді, ол аукцион өткізілген күні веб-порталда сатушы мен жеңімпаздың ЭЦҚ қолданысымен қол қойылады.

Сауда нәтижелері туралы хаттама – аукцион нәтижелерін және жеңімпаз бен сатушының сату бағасы бойынша сатып алу-сату шартын жасасу міндеттемелерін бекітетін құжат болып табылады.

Сатып алу-сату шарты веб-порталда электрондық форматта жасалады және сатушы мен жеңімпаз тарапынан сауда нәтижелері туралы хаттамаға қол қойылған күннен бастап он күнтізбелік күннен кешіктірілмей ЭЦҚ қолдану арқылы қол қойылады. Шартта сатып алу-сату шартын жасасу негізі ретінде сауда нәтижелері туралы хаттамаға сілтеме көрсетіледі.